Hind MeiN Jamhooriyat ke saath Saal


Hind MeiN Jamhooriyat ke saath Saal
Ahmad Ali Barqi Azmi

Hind meiN jamhooriyat ke saath saal
Ahd e nau meiN aaj haiN ek nek phaal

Hai DarakhshaaN is ka maazi aur haal
Is ki azmat ke nishaaN hain la zawaal

Hai jahaaN bhi aaj jamhoori nizaam
Dete haiN ahl e nazar is ki misaal

In guzashtah saath saaloN meiN yahaaN
Fikr o fun ka baar aawar hai nehaal

Hai yeh aqsaa e jahaaN meiN sar buland
KyoN na haasil ho ise auj e kamaal

IT meiN yeh sar e fihrist hai
Jo hai fikr o fun ka dilkash ittesaal

Dekh kar ahl e nazar haiN dam bakhud
Is ki tahzeebi rawaayat ka jalaal

Is ke haiN fitri manazir dilfareb
Hai yeh ek mashshatah e husn o Jamaal

Hai dua meri basad ijz o neyaaz
HooN na yeh jamhoori qadreiN paimaal

Amn e aalam ka ho yeh Barqi naqeeb
Is ko haasil ho urooj e la zawaal

Photobucket