MUBARAK HO SABHI AHL E WATAN KO JASHN E AAZAADI
AHMAD ALI BARQI AZMI
CHALO MIL KAR MANAEIN AAJ HUM SAB JASHN E AAZAADI
WOH AAZADI NA HO JIS MEIN KISI KI KHANA BARBADI

YEH DEKHEIN HUM NE KYA PAYA HAI 65 SAAL MEIN AB TAK
DUA HAI YEH NAZAR AAYE SABHI CHEHRON PE SHADABI

NAMUNA SAMNE SAB KE HO MOHAN DAS GANDHI KA
NA HO AALOODAH KHOON MEIN ZEB E TAN HAI AAJ JO KHADI

HAI SAB KA FARZ DEKHEIN JHANK KAR APNE GAREEBAAN MEIN
KAHAAN TAK HUM HAIN AMALI ZINDAGI MEIN ADL KE AADI

"JIYO AUR JEENE DO '' KE FALSAFE PAR HON AMAL PAIRA
NA HO TARZ E AMAL SE APNE NALAAN KOII AABADI

KIYA HAI ZIKR JIS KA EK GHAZAL MEIN MIRZA GHALIB NE
NAZAR AAYE KAHIN KOII NA HARGIZ NAQSH E FARYADI

HO SAB KI DASTARS MEIN ROTI, KAPDA AUR MAKAAN BARQI
MUYASSAR HON YEH ASHYA E ZAROORI SAB KO BUNIYADI

Kaif o masti se haiN sarshaar tumhaari aankheiN
Deti haiN daawat e deedaar tumhari aankheiN

Ho gaii salb usi din se meri taqat e sabr
Mujh se jis din se hueiN chaar tumhari aankheiN

un se roshan hai meri shama e shabistaan e hayaat
haiN meri munis o ghamkhwar tumhari aanheiN

Dekhta rahta hooN maiN saakit o saamit un ko
Hoti haiN jab kabhi khoonbaar tumhari aankheiN

Deti haiN izn e safar mujh ko bayak jumbish e chashm
HaiN mere waqt ki raftaar tumhaari aankheiN

MaiN kahoon ya na kahooN ahl e nazar par hai ayaaN
Hasrat e dil ka haiN izhaar tumhari aankheiN

Khol kar jalwah gah e naaz meiN dar wazah e dil
Dil pe karti haiN mere waar tumhari aankheiN

Lazzat e kaam o dahan sab ke liye haiN yaksaaN
Ba'is e garmi  e baazaar tumhari aankheiN

Aatash e rask meiN jal bhun ke huii hai andhi
Dekh kar nargis e bimaar tumhaari aankheiN

Rooh farsa hai judaaii ka tasawwur Barqi
Karti haiN khwab se bedaar tumhari aankheiN