احمد علی برقی اعظمی

My Poetic Introduction: ٓAhmad Ali Barqi Azmi : احمد علی برقی اعظمی : میرا منظوم تعارف

افتتاحیہ اشعار و اظہار امتنان و تشکر بحضور سراج الادب ادبی فورم 

ڈاکٹر احمد علی برقی اعظمی

میں سراج الادب کا ہوں ممنون

جس نے بخشا ہے مجھ کو یہ اعزاز

فیس بُک پر ہے یہ سفیر ادب

ہے سبھی فورموں سے یہ ممتاز

سلسلہ اس کا ’’ شاعر امروز ‘‘

اس کے حسنِ عمل کا ہے غماز 

ہے یہ اردو ادب کا شیدائی

منفرد اس کا سب سے ہے انداز

یہ کرے سب کی ہمت افزائی

باعث فخر اس کا ہے آغاز 

قابلِ قدر ہیں ندیم ولی

درِ دانش جو کررہے ہیں باز

مستحق داد کی ہیں شمع ندیم

ہے بلند ان کے ذہن کی پرواز

اس میں عینا اسیر و خضری کا

حسنِ فکر و نظر ہے مایہ ٔ ناز

لبنیٰ اطہر ، حبیبہ سرور بھی

اس میں ہیں اپنے وقت کی آواز

آج کی شام ہے جو میرے نام

ہے یہ میرے لئے بڑا اعزاز

جملہ احباب کا بھی ہوں ممنون

کامیابی کا ہیں جو اس کی راز

ہے دعا ایسے ہوں سبھی فورم

جیسے برقی ہے یہ ادیب نواز

پیشکش : محبی محمد مجید اللہ

دس نومبر کا وجے واڑا میں دن تھا یادگار

رونمائی کی وہاں تقریب تھی اک شاندار

کلچرل سینٹر وجے واڑا کے زیر اہتمام

بین الاقوامی تھا یہ اجلاس فخر روزگار

میرے یار مہرباں جاویدؔ کا تھا لطفِ خاص

ساتھ تھی اُن کے سکونت میری وجہہ افتخار

پدمجا پیڈی تھیں اس تقریب کی روح رواں

جس میں شامل سولہ ملکوں کے تھے شعرا نامدار

ملٹی لینگول شعری مجموعے کا اجرا تھا وہاں

جس کے ہے صفحات کی زینت کلامِ خاکسار

مختلف لہجوں میں سننے کو ملے دلکش کلام

جن کے گلہائے مضامیں سے فضا تھی مُشکبار

چوتھا یہ مجموعۂ اشعار ہے اس بزم کا

جس کے ہے صفحات کی برقیؔ ضخامت اک ہزار

کہتے ہیں آج اردو ہے اک عالمی زباں

احمد علی برقیؔ اعظمی

کہتے ہیں آج اردو ہے اک عالمی زباں

یہ قافلہ ہے جانبِ منزل رواں دواں

حضرت امیر خسرو سے غالبؔ کے عہد تک

اردو کے ہے عروج کی پُرلطف داستاں

آزاد ہے یہ مذہب و ملت کی قید سے

اب عالمی زبان ہے یہ لشکری زباں

جمہوریت کی آج یہ زندہ مثال ہے

ہر جا ملیں گے آپ کو اردو کے قدرداں

اردو زبانِ دل ہے غزل اس کی جان ہے

اِس صنف کا ہے سکہ جدھر جاءئے رواں

آشوبِ روزگار میں اردو پلی بڑھی

سرسید اور حالیؔ تھے اردو کے پاسباں

ڈپٹی نذیر احمد و شبلیؔ تھے اُن کے ساتھ

تھے اپنے عہد میں یہ زبان و ادب کی جاں

ہم کھا کما رہے ہیں فقط اس کے نام پر

کرتے ہیں فخر اپنی ہے یہ مادری زباں

نسلِ جدید آج ہے اردو سے نابلد

رومن میں لکھ رہی ہے یہ اردو کہانیاں

کیا فیس بُک پہ اردو ہے سوچا یہ آپ نے

کیا صرف یہ ہماری ہے بس مادری زباں

نوبل انعام کس کو مِلا آج تک بتائیں

اہلِِ نظر کی آج ہے غیرت کا امتحاں

میری بصد خلوص ہے یہ آپ سے اپیل

سنجیدگی سے غور کریں اب ہیں ہم کہاں

اب میرؔ و ذوق ؔ و غالبؔ و مومنؔ نہیں رہے

مٹتے ہی جارہے ہیں یہ عظمت کے سب نشاں

لازم ہے ہم پہ مل کے کریں اس کا احتساب

یو این کی آج تک نہیں اردو ہے کیوں زباں

اردو ہے اب جمود و تعطل کا کیوں شکار

اردو کے اس زوال پہ برقیؔ ہے نوحہ خواں