https://egohater.wordpress.com/2018/05/30/%D8%B9%D8%A7%D9%84%D9%85%DB%8C-%D9%85%D8%A7%DB%81%D9%86%D8%A7%D9%85%DB%81-%D8%A2%D8%B3%D9%85%D8%A7%D9%86%D9%90-%D8%A7%D8%AF%D8%A8-%D8%AC%D9%88%D9%86-2018/



عالمی ماہنامہ آسمانِ ادب جون ۲۰۱۸

عالمی م

اہنامہ آسمانِ ادب جون 2018

عالمی ماہنامہ آسمانِ ادب جون 2018

ڈاکٹر احمد علی برقی اعظمی

روح مومن کی غذا رمضان ہے

منبعِ جود و سخا رمضان ہے

اشہبِ ایماں کی یہ مہمیز ہے

مظہرِ صبر و رضا رمضان ہے

دور کردیتا ہے دل سے تیرگی

نورِ عرفاں کی ضیا رمضان ہے

چُست کردیتا ہے جسمانی نظام

ہر مَرَض کی وہ دوا رمضان ہے

قید ہوجاتا ہے شیطاں اس لئے

باعثِ ردِ بَلا رمضان ہے

بندۂ مومن کی ہے وجہہِ نجات

زُہد و طاعت کی جزا رمضان ہے

وجہہِ وجودِ عالمِ امکاں جو نام ہے

کون و مکاں میں بس وہی خیرالانام ہے

نازل ہوا جو اس پہ خدا کا کلام ہے

اس کا ہے جو پیام خدا کا پیام ہے

فرمایا اس نے جو بھی وہ نقشِ دوام ہے

اسلام کا نظام اسی کا نظام ہے

بعد از خدا سبھی سے ہے افضل اسی کی ذات

سب سے بلند اس کا جہاں میں مقام ہے

ہے اُس کے بعد ختم نبوت کا سلسلہ

ہیں جتنے ابنیا وہ سبھی کا امام ہے

خود مدح خواں ہو جس کا خداوندِ ذوالجلال

لازم سبھی کو اس پہ درود و سلام ہے

حسان سے بڑا نہیں کوئی بھی نعت خواں

برقیؔ رسولِ پاک کا ادبیٰ غلام ہے

نعت رسول اکرم ﷺ اور

منظوم خطبۂ صدارت

نور سے جن کے جہانِ آب و گِل ہے ضوفگن

بیسٹ اردو پوئٹری کی یہ خصوصی پیشکش

کرتی ہے ان پر نثار اپنے یہ گُلہائے سخن

نعتِ محبوبِ خدا ہے ایک روحانی غذا

گوہرِ مضموں ہے جس کا روشن از دُرِ عدن

اُن کا ہی یہ نور ہے وجہہِ وجودِ کائنات

جس کا چرچا ہر طرف ہے انجمن در انجمن

اُن سے بڑھ کر دوسرا کوئی نہیں بعد از خدا

ہوگا کم اُن پر فدا کردیں جو اپنے جان و تَن

کی بقدرِ ظرف اُن پر سب نے جو نذرِ خلوص

تھا تصدق اُن پہ ہی سب کا شعورِ فکر و فن

مدح خواں ہو جس کا برقیؔ خود ہی ربِ کائنات

کیا بیاں کوئی کرے اس شخصیت کا بانکپن

برقیؔ ہی نہیں سب کے لئے روحِ رواں ہے

احمد علی برقی اعظمی

’’ میں تو شامل ہوں محبت کے گنہگاروں میں‘‘

جو نظر آتے ہیں تاریخ کے شہ پاروں میں

مجھے شامل نہ کرو ایسے قلمکاروں میں

نذرِ دہشت کہیں ہو جائیں نہ بازاروں میں

بٹ گئی بزمِ سخن ایسے اداکاروں میں

بوم آتے ہیں نظر شاخ پہ گلزاروں میں

رقص کرتے تھے جو تلوار کی جھنکاروں میں

جائے عبرت ہے وہی قوم ہے ناداروں میں

جس کے اسلاف تھے اپنے کبھی معماروں میں

خوئے اخلاص وہ باقی نہ رہی یاروں میں

ملک و ملت کے جو برقی تھے وفاداروں میں

خمار بارہ بنکوی اور احمد علی برقی اعظمی

خمار بارہ بنکوی

واقف نہیں تم اپنی نگاہوں کے اثر سے

اس راز کو پوچھو کسی برباد نظر سے

اک اشک نکل آیا ہے یوں دیدہ تر سے

جس طرح جنازہ کوئی نکلے بھرے گھر سے

رگ رگ میں عوض خون کے مے دوڑ رہی ہے

وہ دیکھ رہے ہیں مجھے مخمور نظر سے

اس طرح بسر ہوتے ہیں دن رات ہمارے

اک تازہ بلا آئی جو اک ٹل گئی سر سے

صحرا کو بہت ناز ہے ویرانی پہ اپنی

واقف نہیں شاید مرے اُجڑے ہوئے گھر سے

مِل جائیں ابد سے مرے اللہ یہ لمحے!

وہ دیکھ رہے ہیں مجھے مانوس نظر سے

جائیں تو کہاں جائیں کھڑے سوچ رہے ہیں

اُٹھنے کو خمار اُٹھ تو گئے ہم کسی در سے

جاتا نہیں یہ عشق کا سودا مرے سر سے

لوٹ آتا ہوں جا جا کے دوبارہ ترے در سے

میں حال زبوں اپنا کسی سے نہیں کہتا

’’ اک اشک نکل آیا ہے یوں دیدۂ تَر سے ‘‘

دیتا ہے صدائیں مجھے معلوم نہیں کون

آتی ہے اک آواز اِدھر اور اُدھر سے

وحشت زدہ کرتا ہے مجھے اپنا ہی سایہ

کرتا ہے تعاقب کوئی جاتا ہوں جدھر سے

تم سن نہیں سکتے میں سنا بھی نہیں سکتا

کرتا ہوں یہ تحریر رقم خون جگر سے

دیکھا ہے کہیں تم نے مرے رشکِ قمر کو

میں پوچھتا رہتا ہوں یہی شمس و قمر سے

برقی کو کہیں دیکھا ہے تم نے ، تو وہ بولا

وہ خانہ برانداز ہے نکلا ابھی گھر سے