Tuesday, August 27, 2013

Dil ki Duniya Mere Veeran Hai Aaye Koii: Ahmad Ali Barqi Azmi

Dil ki Duniya Mere Veeran Hai Aaye Koii
Ahmad Ali Barqi Azmi
Jada e shauq ye sunsaan hai Aaye koii
Dil ki duniya mere veeran hai aaye koii

Hasb e wada agar aa jaye to hoga ehsan
Jaan kar mujh se jo anjaan hai aaye koii

Safha e zehn se mitte nahiN yaadoN ke nuqoosh
Us ke , jo ab meri pahchan hai aaye koii

Mere afkar e preeshaN ka ho gar paas o lehaaz
Dil mera aaj pareeshan hai aaye koii

JaaN balab hasrat e deedar ka hai jo pyasa
Chand lamhoN ka hi mehman hai aaye koii

Bojh jo dil pe hai ho jayega is se halka
Yun to Allah nigahban hai aaye koii

Qasre dil maiN ne saja rakhkha hai apna,jis meiN
Us ke har zauq ka saman hai aaye koii

Kya maza milta hai Barqi ko satane meiN use
Misl e aaina woh hairan hai aaye koii

No comments: