طرحی غزل بیاد نامور کلاسیکی شاعر مصحفی برائے آن لائن طرحی مشاعرہ انحراف احمد علی برقی اعظمی


طرحی غزل بیاد نامور کلاسیکی شاعر مصحفی برائے آن لائن طرحی مشاعرہ انحراف
احمد علی برقی اعظمی

یہ کیسا ہے ہرسو نظارا زمیں پر
ہر اک شخص ہے غم کا مارا زمیں پر

جو ہیں حکمراں وہ سمجھتے ہیں ایسے
نہیں جیسے کچھ بھی ہمارا زمیں پر

وہیں لوٹ جاتے جو ہوتا یہ بس میں
نہیں اب کوئی اپنا یارا زمیں پر

ہر اک سمت کنکریٹ کے اب ہیں جنگل
کرے کوئی کیسے گذارا زمیں پر

کہیں زلزلہ ہے کہیں ہے سنامی
ہیں دیوار و در پارہ پارا زمیں پر

کھٹکتے ہیں ہم یوں نگاہوں میں اس کی
نہ ہوں جیسے اس کو گوارا زمیں پر

یہ جاہ و حشم چندروزہ ہے اس کا
نہ ہے اب سکندر نہ دارا زمیں پر

وہی صحنِ گلشن ہے زد پر خزاں کی
جسے خونِ دل سے سنوارا زمیں پر

وہی ابنِ آدم کے خوں کا ہے پیاسا
جو انسان تھا عالم آرا زمیں پر

کیا جس نے تخلیق سب کچھ ہے اس کا
نہیں کچھ ہمارا تمھارا زمیں پر

ہے بے فیض تشنہ لبوں کی نظر میں
سمندر ہے جس طرح کھارا زمیں پر

جسے مال و دولت پہ تھا ناز اپنے
’’ پھرے ہر طرف مارا مارا زمیں پر‘‘

نبرد آزما ہے وہ فطرت سے برقی
فلک سے گیا جو اتارازمیں پر

Dr. Ahmad Ali 'Barqi' Azmi is an eminent Urdu broadcaster and poet. He has been working with the All India Radio for more than three decades. His father, Mr. Rehmat Ali Barq was an well-known poet and belonged to the Dabistan-e-Dagh. Barqi is a poet of international fame, known mainly for his prowess to compose verses on the spot (Filbadeeh poetry). Rooh-e-Sukhan is his first collection of poetry.

شاید آپ کو یہ بھی پسند آئیں