ایک زمین کئی شاعر مظفر احمد مظفر ( لندن ) احمد علی برقی اعظمی ( نئی دہلی) , بشکریہ ناظم ایک زمین کئی شاعر
ایک زمین کئی شاعر
مظفر احمد مظفر ( لندن ) احمد علی
برقی اعظمی ( نئی دہلی)
مظفر احمد مطفر
ہستیٔ موہوم کیف دوجہاں کچھ بھی نہی
جز ترے رنگینیٔ کون و مکاں کچھ بھی
نہیں
اپنی ناکامی کامجھ پر کُھل گیا سرِ
نہاں
اس جہاں میں حاصلِ عمرِ رواں کچھ بھی
نہیں
عزمِ راسخ ہے تو منزل خود پکارے گی تجھے
راہ کی تلخی شکستِ جسم و جاں کچھ بھی
نہیں
فتنۂ غُربت اک ایسے دیس میں لایا
جہاں
کوئی ہمدم ، مہرباں نا مہرباں کچھ بھی
نہیں
ایک ایسی آگ خاکستر مجھے کرتی رہی
جاں جلاتی ہے مگر جس کا دھواں کچھ بھی
نہیں
جان لے مری تڑپ سے شدتِ رمج و محن
ورنہ مجھ نخچیر بسمل کی زباں کچھ بھی
نہیں
اب مجھے آزاد کرکے کیا ملا صیاد کو
جب نظر کے سامنے کون و مکاں کچھ بھی نہیں
ڈوب کر ساحل پہ ہم نے راز یہ جانا تو
کیا
برلبِ ساحل ہے طوفاں درمیاں کچھ بھی نہیں
اس قدرمشتِ غبارِ ذات پر نازاں نہ ہو
خاک کے پُتلے سے بڑھ کر جسم و جاں چھ بھی نہیں
میں ترے کوچے سے اٹھ کر کیا گیا کہ اب
وہاں
کوئی سائل ہے نہ رقصِ نیم جاں کچھ بھی
نہیں
شعر کہنا ہو تو ناظر سے لیا کر مشورے
صرف تیری شوخیٔ حسنِ بیاں کچھ بھی
نہیں
رحم آیا دیکھ کر حالت مظفر کی مجھے
میں پکار اٹھا مرا دردِ نہاں کچھ بھی
نہیں
احمد علی برقیؔ اعظمی
کیا بتاؤں بنِ ترے اے جانِ جاں کچھ بھی نہیں
جسم و جاں میں اب مرے تاب و تواں کچھ بھی نہیں
تونہیں تو میرے یارِ مہرباں کچھ بھی نہیں
بِن ترے میرے لئے عمرِ رواں کچھ بھی نہیں
میری نظروں میں وہ سنگ و خشت کا انبار ہے
تو نہ ہو جس میں مکیں ایسا مکاں کچھ بھی نہیں
کس قدر صبر آزما ہے مجھ کو تیرا انتظار
اس سے بڑھ کر زندگی میں امتحاں کچھ بھی نہیں
سایہ گُستر ہے یہ مجھ پر زندگی کی دھوپ میں
تیری زلفوں کا نہ ہو گر سائباں کچھ بھی نہیں
تجھ سے روشن ہے مری شمعِ شبستانِ حیات
تیرے آگے روشنئ کہکشاں کچھ بھی نہیں
یہ جہانَ آب و گِل میرے لئے بیکار ہے
’’جُز ترے رنگینئ کون و مکاں کچھ بھی
نہیں ‘‘
گر نہ ہو ذہنی سکوں ایسے میں برقیؔ اعظمی
مال و دولت ، عیش و عشرت ، عز و شاں کچھ بھی نہیں
